Dagana 24. – 30. maí nk. mun Kvikmyndaskóli Íslands hreiðra um sig á menningarsetrinu Eiðum. Þar munu hópur útskriftarnema ásamt kennurum bjóða Austfirðingum á öllum aldri upp á ókeypis námskeið í fjöldamörgum greinum er snúa að kvikmyndagerð og jafnframt kynna skólann. Sett verður upp fullkomið stúdíó á Eiðum með 12 tölvum og öllum græjum sem til þarf. Einnig mun hópurinn vinna að mynd um ferðina og sýna útskriftarverkefni sín.

Auglýst er eftir umsóknum í verkefnið Norðursprotar sem ætlað er að styðja við nýsköpunarhugmyndir einstaklinga í atvinnuleit á Norðausturlandi. Verkefnið er fjármagnað af samfélagssjóði Alcoa og unnið í samstarfi Alcoa, Háskólann á Akureyri og Impru á Nýsköpunarmiðstöð. Styrkir eru veittir til gerðar viðskiptaáætlunar eða til frekari þróunar hennar og getur stuðningur við einstaklinga numið allt að 400 þús. kr. Umsóknarfrestur er til 26. maí 2010.

Sjá nánar á vef Impru http://www.nmi.is/impra/um-impru/frettir/nr/1010/

Í síðasta bændablaði er grein eftir Ingigerði Erlingsdóttir verkefnastjóra hjá Þróunarfélagi Austurlands, þar segir hún frá verkefninu Almenningssamgöngur í dreifbýli sem Þróunarfélagið tekur þátt í. Verkefnið er fjölþjóðlegt samstarfsverkefni sem styrkt hefur verið af Norðurslóðaáætlun Evrópusambandsins.

Hvatningarverðlaun Þróunarfélags Austurlands voru afhent á aðalfundi félagsins í Végarði í Fljótsdal í gær.  Þetta er í 10. skiptið sem verðlaunin eru afhent og voru það Fjarðaþrif ehf. sem  hlutu verðlaunin í ár.
Fjarðaþrif er austfirskt fjölskyldufyrirtæki sem veitir alhliða hreingerningarþjónustu með 35 manns í vinnu um allt Austurland.  Fyrirtækið var stofnað í apríl 2003 og  framkvæmdastjóri þess er Lára Elísabet Eiríksdóttir.  Í dag reka Fjarðaþrif ehf. einnig Böggablóm, Böggabón, þvottahús, móttöku í endurvinnslu og móttöku fyrir Landflutninga.
Þróunarfélagið óskar Fjarðaþrif til hamingju með verðlaunin